Դասընթացի թեմաները
Ծրագրային նյութերի բովանդակությունը՝
«Դիետոլոգների և Նուտրիցիոլոգների Հայկական Ասոցիացիայի» կողմից կազմակերպվող
«Ճարպակալման ժամանակակից մոտեցումներ․ ախտորոշում, բուժում և երկարաժամկետ կառավարում» դասընթացը մշակված է որպես մասնագիտական կրթական ծրագիր՝ թերապևտների, էնդոկրինոլոգների, գաստրոէնտերոլոգների և ընտանեկան բժիշկների համար։
Դասընթացի բովանդակությունը լիովին հիմնված է գիտահեն և ապացուցողական բժշկության սկզբունքների վրա և համահունչ է ճարպակալման բուժման միջազգային ուղեցույցներին, և ժամանակակից կլինիկական պրակտիկային։ Ծրագիրը ներկայացնում է ճարպակալումը որպես քրոնիկ, ռեցիդիվող մետաբոլիկ հիվանդություն, ընդգրկելով դրա պաթոֆիզիոլոգիական հիմքերը, նեյրոհորմոնալ կարգավորումը, գենետիկ և էպիգենետիկ գործոնները, ինչպես նաև ճարպային հյուսվածքի էնդոկրին դերը։
Դասընթացի շրջանակում մանրամասն քննարկվելու են ճարպակալման ախտորոշման ժամանակակից մոտեցումները, մարմնի կազմի գնահատումը, սարկոպենիկ ճարպակալումը, ինչպես նաև ճարպակալման հետ կապված մետաբոլիկ հիվանդությունները՝ ներառյալ ինսուլինառեզիստենտությունը, նախադիաբետը, Տիպ 2 շաքարային դիաբետը, դիսլիպիդեմիան, MASLD/MASH-ը և սրտանոթային բարձր ռիսկը։
Ծրագրի կարևոր բաղադրիչն է դեղորայքային բուժման ժամանակակից ռազմավարությունների ներկայացումը՝ ներառյալ GLP-1 ընկալիչների ագոնիստները, GIP/GLP-1 ընկալիչների երկակի ագոնիստները և այլ, դրանց ընտրությունը ըստ պացիենտի պրոֆիլի, համակցված հիվանդությունների առկայության, բուժման արդյունավետության գնահատումը, կողմնակի ազդեցությունների կառավարումը և բուժման դադարեցման կամ փոփոխման ցուցումները։
Առանձին ուշադրություն է դարձվում քաշի վերադարձի խնդիրներին, ինչպես նաև բազմամասնագիտական (մուլտիդիսցիպլինար) մոտեցման կարևորությանը և բարիատրիկ վիրաբուժության ուղեգրման հստակ ցուցումներին։
Դասընթացն ունի բարձր գործնական արժեք, քանի որ ուղղված է առաջնային և երկրորդային բուժօգնության մասնագետների կլինիկական մտածողության զարգացմանը, վաղ ախտորոշման բարելավմանը, բարդությունների կանխարգելմանը և ճարպակալում ունեցող պացիենտների երկարաժամկետ արդյունավետ կառավարմանը։
